Pīturys punkti bez pīturu Andrejdīnā
Sestdien, 30.novembrī Rēzeknis piļsātys kulturys nomā jau pīcpadsmitū raizi nūtyka literari muzikalais Andrejdīnys pasuocīņs.
Kai īrosts, beja sasatikšona ar dzejnīkim i muzikim, puorsteiguma bolvys i pateikami atmiņu puorsteigumi pošim pasuokuma reikuotuojim. Andrejdīnys dalinīkus ar sovu dorbu lasejumim prīcēja Rēzeknis Augstškolys (RA) literatu kūpkruojuma "Pīturys punkti bez pīturu" autori. Muzikalū fonu i pauzis pīpiļdēja RA students, "Zaļuo kuora" dzīduotuojs Rolands Keišs.
Pasuokuma laikā dalinīki tyka īpazeistynuoti ar divejim RA izdavumim. Vīns nu tim jau īprīkš pīmynātais kūpkruojums "Pīturys punkti bez pīturu", kurā apkūpuoti 19 RA literātu dorbi. Kruojums ir kai sova veida nūslāgums RA reikuotajam konkursam, kas nūtyka par gūdu augstškolys 20 godu jubilejam i kurā sovus dorbus pīduovuoja kai absolventi, tai asūšī studenti. Starp kūpkruojuma autorim minami gon jau taidi zynomi literati kai Līga Seiksta, Līga Rundāne, Ineta Atpile-Jugane, Betija Berga, gon ari cereigi, sovu stylu veidojuši jaunī autori: Māreite Krasnoboja, Inga Kaļva, Ilze Elizabete Vaivode, i taidi, kam pasaruoda pyrmī literarī raudzejumi: Ausma Sprukte, Laura Stepiņa, Gita Nagle i cyti.
Ūtrys – DVD "Kaunatys vītu vuordu stuosti" – bilingvāls izzinis i vuiceibu materials, kas dūmuots školom, bibliotekom, nūvoda kulturviesturis i folklorys pietnīkim i sevkuram interesentam. Kai īrosts, RA izdavumus varēs sajemt nūsauktūs īstuožu puorstuovi, tik juosekoj prezentacejis pasuokumim. DVD diska materialus ir savuokuši RA filologejis i viesturis programmys 3. kursa studenti 2012. goda folklorys ekspedicejis laikā Kaunatys pogostā.
Kai īrosts, arī itamā reizē naizpalyka Andrejdīnys bolva. Tū sajieme Līga Seiksta, kura ir ari Andrejdīnys tradīcejis iniciatore.
Sevkurs pasuokuma dalinīks varāja ari aktivi izakustēt, izdoncojūt Lelvuordis jūstā atrūnomūs rokstus. Par itū ornamentu sovpateibu vaira pastuostēja projekta "Lielvārdes jostas dejas raksti" vadeituojs, pats lels doncuotuojs i pietnīks Ernests Spīčs. Bet danču sūļam īdrūšynuoja deju kūpa "Dziga". Vysi kūpā, sorkanajam ar boltū sasajaucūt, veiduoja lelu i skaistu musturu. Musturu, kurš raksteits pošu doncuotuoju pādom i prīkā speideigom acim, gareigi pīejūt tiuļuok vīns pi ūtra i sajiutūt mīru i myusu senču atstuotū spāku, kas tānejuos dīnuos ir tik cīš vajadzeigs, kab var īt tuoļuok i dareit, naaizmierstūt, ka "mes poši pīturys punkti/ golapunkti/ celi i leikumi".
Pasuokumu reikuoja i atbolstēja Rēzeknis Augstškola i Rēzeknis Latgalīšu kulturys bīdreiba.
Uz sarakstu
